A ilusión é ese fío delgadiño que nos dá forza para superar as adversidades, ese soñar na felicidade compartida da nosa xente, os desexos de paz e de amor. Cando chega o Nadal parece que todas as nenas e todos os nenos colledes impulso, enerxía e determinación. Parece como se quixerades apropiarvos deste tempo de luces e de estrelas. Porque sabedes que é voso e que neste ano de pandemia e de incertezas aínda vos pertence moito máis.

​

As persoas adultas que vos acompañamos no camiño da vida, as nais, os pais, as mestras, os amigos... sabemos moi ben dos esforzos que tivestes que facer ao longo de todos estes meses, de como ás veces o medo e a tristeza parecían escurecer a vosa mirada. Sen embargo, o ano 2020 tamén será o ano no que ficou demostrada a vosa coraxe e a vosa forza. Merecedes o mundo e merecedes que o mundo recoñeza o voso valor. Bo Nadal!